[香港經典廣告](1991)大快活 兩餸套飯
今日同大家分享嘅係1991年大快活宣傳兩餸套飯嘅廣告，估唔到喺30年後嘅今日，疫情下賣兩餸飯嘅舗頭成行成市…… 大快活喺八九十年代嘅形象上一直無大家樂咁創新，當年用嘅小丑笑臉商標令到形象更覺守舊。 直到2003年底推出全新品牌形象、改善食物質素同將分店重新裝修，先至有一番新氣象！ 大快活今年迎接50周年玩懷舊，喺紙杯膠袋同分店重現「小丑」Logo。 廣告中使用嘅宣傳口號「大快活精神 挑戰無限分」由80年代尾已經開始用，同大家樂當時使用嘅宣傳口號「做足一百分」打對台！
